聽晚場英超大戰，利物浦主場迎戰阿仙奴，肯定唔會有紅軍前鋒巴洛迪利（小圖）。巴神早前喺社交網發佈種族歧視語句，啱啱被英足總判罰停賽1場，兼25,000鎊（約24萬港元）罰款，仲勒令佢上再教育課程，而佢被罰後已喺twitter公開道歉。
巴神唔生性，有指佢細個已經有注意力缺乏症。所以紅軍可能搵緊替代佢嘅人選；有傳喺1月斟皇家馬德里嘅賓施馬，不過要由爭世冠爭歐聯嘅球隊，轉投聯賽前4都未必保得住嘅利物浦，好似爭啲囉。
阿仙奴近排好番啲，又有禾確特復操、奧斯爾康復情況良好嘅利好消息，成班球員都心情靚靚，日前仲去咗倫敦一間醫院探訪病童（上圖）。不過當阿歷士張伯倫同兩個隊友，去探一位小朋友嘅時候就發生尷尬事，嗰位小朋友原來係利物浦粉絲，仲童言無忌咁話：「我唔多鍾意阿仙奴，可唔可以搵利物浦球員嚟呀？」
識睇，一定係睇足英台【英波Live】：
http://soccer.appledaily.com
http://bit.ly/engballlive