立法會主席曾鈺成同佢位局長細佬曾德成，平時喺公開場合都好似冇乜交流，令到佢兩個嘅感情係點相當撲朔迷離。咁啱噚日立法會開埋今年內最後一次大會後，兩兄弟狹路相逢，德成一見大佬就話「英明、英明」，做大佬嘅曾主席就甜笑回應，畫面真係好warm﹗
話說噚日嘅大會臨完結前，曾主席話由於相信個會都唔可能喺晏晝1點收到工，為咗唔影響晏晝嘅內會、財會，同時佢相信議員放完聖誕、新年假之後，會有更精采嘅意見發表，所以宣佈休會。就係咁，令到經民聯林健鋒提出，有關增加青年上流機會嘅議案搞到跨年先投得票。
曾鈺成走嗰陣撞到細佬德成局長，德成局長一見到大佬就讚大佬英明。做大佬嘅鈺成好瀟灑，唔出聲，不過笑笑口、揮揮手咁行咗去。八方即使唔係佢心裏面條蟲，都感覺到佢嘅喜悅，但係就唔係好明曾鈺成英明在啲乜囉。