沙田馬場今朝(19日)有四組試閘，第二組1200米泥閘賀賢馬房的「回眸一笑」，只是一匹未曾上陣的四班馬，亳無賽績根據及名氣可言，但馬主就無人不曉，此匹三歲馬正是前政務司司長唐英年回歸馬圈後首匹愛駒。
「回眸一笑」備戰都好積極，8月開操至今未停過，10月及11月已試過三次大閘，全部由韋達經手，次次都冇乜走勢。呢日係佢第四度試閘，韋達放棄唔試，莫非認為隻馬前景麻麻，唔想再嘥時間？今次試閘由華將何澤堯接手，出試前賀賢都好緊張吓，捉住何澤堯，猛咁向佢教路，不斷講解隻馬嘅脾性，先至俾堯仔上馬出跑道。不過「回眸一笑」或者根本唔係短途馬，亦可能暫時進度一般，始終喺短途閘冇表現，今課沿途居後，直路亦冇乜追勢，結果只跑第7，睇嚟唐唐想拉頭馬，仲要等一段日子。
唐唐對上一次贏馬，已經係09年2月15日嘅「心福」，而佢歷來養過最多捷嘅馬係「富士晨曦」，累積7 WIN咁多；最重要嘅勝仗就係來自「大殺手」，響2000年5月由馬佳善攻下1200米一級賽主席獎。