雨傘運動曲終人散，雖然大家講明We'll be back，但唔知何時再在公路上再相聚。整場運動，政府半步不讓，看似乜嘢成果都冇，但係其實對於某啲人嚟講，呢場運動簡直係成果豐碩，而且影響住自己人生下半場㖭。香港人出名有效率，爭民主不忘尋真愛，有港男話過男人一生只為尋覓一個肯同自己捱麥記嘅女人，不過對於雨傘廣場嘅村民嚟講，一生只為尋覓一個肯同自己捱催淚彈嘅人就於願足矣。
八方日前見到佔中發起人戴耀廷，佢透露79日嘅佔領日子催生「傘下情」 ，當然唔係講周永康同岑敖暉呢類純搞笑hehe「傘下情」。據佢所知，由於佔領日子長達79日，足以日久生情，有三對佔中義工嘅男女，喺佔領期間互生情愫，最終喺佔領期間成功佔領對方心扉，開花結果成為小情侶。
笑言唔撤離隨時結婚生仔
和平佔中搞咗兩年，佔中義工隊好多都係年輕人，當中不乏靚仔靚女，日久生情實在難免。戴教授講笑咁話，如果佔領者唔響應佢哋呼籲撤離，長時間佔領嘅話，佔中義工隊嘅小情侶隨時喺佔領期間結埋婚生埋仔。戴耀廷如果將來退出政界、學界，改做speed dating，透過社運做月老都可能殺出血路。
傘下情侶有個好處，就係起碼大家由拖手仔嘅一刻已經知道對方係黃絲，大家對社會嘅目標、價值觀都係一樣，唔使結咗婚先至發現自己另一半嘅政治立場，以免減少爭拗嘅機會，正如早前有女警員話見到自己老公facebook變咗黃色，簡直令佢崩潰。
李八方
mailto:[email protected]