恭喜!甜蜜蜜索模Monna榮升老闆娘

恭喜!甜蜜蜜索模Monna
榮升老闆娘

孫達志馬房嘅「甜蜜蜜」,上次忽然跑嫌長嘅1400米,梗係冇表現啦,作為馬主潘志遠嘅紅顏知己,拍過《金雞SSS》等電影嘅索模Monna林依錡,亦話對愛駒今季仍未建功,感到有啲失望。
不過今期賽事「甜蜜蜜」回師四戰兩冠一季一殿嘅1000米直路賽,仲要抽到有利嘅12檔,Monna接受電話訪問時都話機會樂觀,皆因始終路程正宗,隻馬嘅狀態亦相當Fit,但Monna就預告唔會入場拉頭馬,點解呀?原來佢正忙於籌備開設高級寵物美容店,下個月就開張,聖誕節亦唔知有冇時間同潘生慶祝,所以只能隔空祝福「甜蜜蜜」。至於電影,Monna話唔會放棄,做咗老闆亦可以繼續做藝人,家陣傾緊唔同嘅計劃,希望明年可以拍戲,將自己靚靚嘅一面show畀大家睇。
講番「甜蜜蜜」,服役後第二仗已打開勝門,算係好成功,Monna透露自己都有興趣養馬,但佢笑言買馬好貴,希望將來賺多啲錢再實行。啊,潘生聽到識做啦!至於當初點解隻馬叫做「甜蜜蜜」,Monna指出係大家一齊改名,希望畀人感覺開開心心甜甜蜜蜜,將啲正能量送俾大家喎!