抄功課同出貓一樣，應該只會出現喺中學生身上，不過有啲建制派水平都係咁上下。民主黨新任司庫袁海文今年7月出咗份工作報告（圖右），講述長沙灣副食品批發市場同對面嘅六號地盤規劃問題，當中有幅相，居然喺經民聯區議員李祺逢今個月份工作報告復活，連相裏面啲字都一樣（圖左）。
袁海文話幅相係佢同同事影兼加工嘅，好明顯有人copy and paste啦，仲話咁樣做真係好唔尊重知識產權囉。唔單止咁，袁海文仲話李祺逢今個月份工作報告，整體設計都同佢7月嗰份好似。樂觀啲諗呢，好嘅嘢先會有人抄嘅，況且抄功課就即係懶，懶人又點會有進步呢？相信市民看在眼裏。