【世紀貪案裁決】
【本報訊】縱橫政商界逾30年的許仕仁，曾經擊退股壇大鱷，是政商爭奪的人才，養馬住豪宅，但捲入貪污案後，身敗名裂，債務纏身兼被頒令破產，更一夜間成為階下囚。昔日露出「兔仔牙」神采飛揚的「肥龍」現變得消瘦憔悴，但他在裁決前仍顯現鬼才的一面，跟本報記者論盡政壇，由雨傘運動、梁振英，講到董建華出山，直指梁振英不得民心是因他「衰格」，董建華則是「伯爺公條氣唔順走出嚟攞彩」，又寄語年輕人要學懂內地人的一套，雖然心裏不喜歡共產黨，但願意犧牲自由人權，換取經濟進步。
記者：黃幗慧
唐英年個人蠢
梁振英在2012年7月1日上任同日，即引發40萬人遊行，一年多以來，市民對他的批評不絕於耳。許仕仁認為與梁「衰格」有關：「佢冇人情味，行出嚟乞人憎，唔識social」，而泛民又標籤梁是「奸仔、衰人、陰險，其實又係喎」，加上被認定是「老左」，故不得人心。許認為傳媒也有責任，「你哋又批評佢樣衰」。相反，當年落敗的唐英年，許形容「人味多得滯」及「個人蠢」。
批評一輪，許都有為梁說好話，讚他任內有不少建樹，例如增建房屋、叫停雙非、建議削減自由行等。「梁振英做嘢嘅能力唔係咁高，就一直都係，佢叻係分析。CY好多嘢分析係好透徹好獨到，但最大弱點係，好似睇醫生，醫生同你講你個病係咁咁咁，係講得好啱。但醫呢？你搵第二個專科啦。」形容梁識講唔識做。
至於梁的班子是否有欠理想，許認為這並非梁可以控制，「理論上係可以好啲㗎，但搵唔搵到呢？但呢個環境冇人可以做到嘢㗎喎，中央覺得現時情況OK，有咩問題呀？」
佔領運動期間梁被外國傳媒揭發，涉在上任後收澳洲公司UGL的5,000萬元回佣，有人認為梁所涉的指控，比許仕仁在上任前收賄款更嚴重。報道翌日，記者想問許的回應，許做出將嘴巴拉上鏈的動作幾次，拒絕回應，但他暗暗偷笑。事隔約兩個月，記者再問許，梁可如何收科，許說：「我唔知。（你唔覺得嚴重？）我唔識，我冇咁嘅法律知識。我唔會討論呢樣嘢。（立法會否決調查梁，你會否覺得不忿氣？）點會呀，喺立法會啲嘢，個個都知係做show㗎啦。我唔會講我立場畀你知。」
梁振英不會下台
梁振英表現差強人意，問許是否覺得梁稱職，許沒有直接回答：「以中央角度嚟睇，非常稱職。從香港角度睇，我覺得佢冇做咩大錯事喎。（但政改引發佔中，並發放催淚彈？）嗰日整咗60幾個催淚彈（編按：正確為放87次催淚彈）之後都收手啦。（你意思是梁下令放催淚彈？）咁總之佢係特首，都應該有個角色呀。佢話放嗰時佢冇（角色），到唔放嗰時就有（角色），或者真係咁情況，你唔知呢，你又唔可以話佢卸責。」
至於梁會否下台呢？許斬釘截鐵道：「梗係唔會啦，點解你哋啲人咁天真啫。阿董（建華）嗰時，佢唔好彩，經濟差，沙士、仲有廿三條、50萬人上街，做啲政策又得大隻講。同今次係單一政改，係中央嘅決定，點會覺得要換梁振英呢？習近平係鐵腕，所以佢好欣賞梁振英。」許又揶揄自己說：「中央唔會畀林鄭上，唔係就會好似我咁。」
全國人大常委為2017年特首選舉「連落三閘」，2017只得假普選。許某程度上認同，「你話係咪有少少搵老襯呢？客觀上係嘅，嗰50%（出閘門檻過半數）係太高嘅」。但許警告，若政改不能通過，梁振英隨時連任，「原地踏步，咪益咗佢多五年，得返1,200人（選委），振英掩住嘴笑」。
老董阿松唔順氣
早前相繼有疑似特首候選人爭取曝光，有講明有意參選的葉劉淑儀，又有董建華組織智庫，有指他是為梁錦松鋪路選下屆特首。許如何董和梁錦松再次活躍？「叫個伯爺公走返出嚟，講番十年前嘅嘢，你都黐線嘅！……阿董就不甘寂寞嘅，要佢提早辭職，佢到死都唔眼閉，都要凸番個頭出嚟搵個彩啦，佢同阿松都有共同嘅『（條氣）唔順』呀！」
他指董本身支持梁振英：「上一次炒魷（董05年落台），阿董都諗住係梁振英做㗎嘛，點解忽然搞咗個曾蔭權呢。」
許仕仁在9月開始自辯，其間經歷9.28催淚彈鎮壓事件。他事後憶述當日看着電視，「心唔好受，瞓唔到」。但他並非支持學生，「政府冇做錯，係學生錯。根本（政改）仲有得傾，例如1,200人選委點組成，可以係減漁戶（農）界的票、減公司票、加個人票。我唔擔保泛民可以入閘，但至少有改善。」許還質疑當中有人想搞港獨。
習近平會拉好多人
佔領運動的早期，發生懷疑黑、警合作清場，示威者被反佔中人士扑到頭破血流，但警方視若無睹。許撐警完全做得對，「警方唔係縱容，係人手唔夠，嗰度咁多黃賭毒，平時都縱容㗎啦。如果放胡椒噴霧，兩邊都傷。要解決問題，流血難免，一定會殺錯良民，一定有犧牲。」
金鐘佔領區遲遲沒有清場行動，許指政府一直靠拖，「阿爺睇死幾樣嘢，你啲香港少爺小姐，走去嗰度，做到乜嘢呀；第二：香港法治自由好過好多地方，經濟都係好。睇死你坐響度，鬥坐囉，你唔鍾意我清場放催淚彈，咁咪唔放囉，到一月寒風凜凜，你咪去坐囉，去燒嘢食囉。」至於如何收拾殘局？許說：「習近平喺度，拉、打，遲啲會拉好多人。」
忍共產黨存在交易
不少市民，就是抗拒共產黨的強權統治。許仕仁直言，香港人絕大部份都討厭共產黨，「香港700幾萬人，大部份都唔鍾意共產黨，人人都知架嘞，九七前九七後都係」。他相信，內地人亦然，但只要能以金錢利益作交換，內地人甘願放棄自由和人權。「共產黨係做咗好多衰嘢，我同意嘅，我只係覺得喺個過程入面，13億人都覺得我可以容忍你共產黨，係有個交易喺度，個交易就係穩定、生活水準慢慢提高，最窮嗰啲都好過廿年前。」許勸誡香港的年輕人要有遠大眼光，「香港得嗰豆膶咁大，幾百萬人，發到咩圍啫」，要學內地人有「大我國家」的概念，學懂犧牲才能令香港進步。
然而雨傘運動，年輕人亦是為了未來，要求真普選。但許認為，普選不一定好。「因為𠵱家冇執政黨，你要有配套㗎，冇政黨執政、冇政黨輪替，個後果可以好差㗎，咁變咗民粹呀。仲有𠵱家唔係兩院制嘛，單一淨係選個特首出嚟，好弊，冇其他嘢制約同制衡。」許說。
經過雨傘運動一役，許仕仁分析泛民在2016的立法會選舉會大敗，理由是泛民跟激進的年輕組織關係是「你中有我，我中有你」。他指公民黨表面上是理性，專業，但要依賴激進的年輕人，關係越見浮面，「整體泛民一定係蝕底」。
楊怡個鼻咁靚咩
貪污案由5月開審至今，經歷8個月，記者問他政事，他談到天花龍鳳，滔滔不絕，但說到自身問題，他則一句起、兩句止。問他心情如何，他說：「咁耐以嚟都差唔多，無乜大分別。睇上面，我信宿命，整定嘅。」同個天提出請求？「邊可以臨急抱佛腳，唔得㗎，亦冇講咩請求。」回想過去做有否做錯？「唔會答呢啲。」有否兩手準備？「唔答，你唔好好似主控官Perry咁啦。」同郭炳江還是否朋友？「唔答。」
一向愛聽歌看影碟的許仕仁，審訊期間也是靠看碟消磨時間，他說：「美國、英國，乜都睇。睇宮崎駿，因我好多都未睇，（風起了？）我未睇，我睇番屋企啲舊碟」。有雜誌早前拍攝到他購買「魔女宅急便」真人版的光碟，許澄清「真人版唔好睇，我冇買。」許還說，審訊以來，有很多記者跟蹤他，許笑言：「如果我悶，就可以搵佢哋（記者）傾偈。」
港視在11月開台，記者問許有否看港視，還在使用傳統手提電話的許說不懂下載，但好奇問港視有甚麼藝人。記者告訴他有黃日華和廖啟智，許失望說：「得呢啲咋，冇花旦小生？」記者表示還有李心潔，許再次失望：「李心潔邊係後生。」記者舉例年輕的有黃日華女兒，問許是否認識，許答：「唔識。」許然後主動談到無綫花旦楊怡，「楊怡個鼻好長，咁靚咩？佢個鼻側邊睇透明喎。」