歌手張敬軒一向敢言，早前有內地網民抹黑他是港獨分子，令他大動肝火，發聲明保護家人之餘，也反擊網友抹黑言論。昨日軒仔再度火起，一向予人斯文有禮的他，竟在instagram爆粗點名痛罵兩名fans，雖然事後刪掉留言，已引起大批粉絲討論叫他息怒。
軒仔昨日在九龍灣出席活動時仍然勞氣，他說：「我實在冇辦法忍受，新一代啲小朋友咁冇家教，女仔人家講乜嘢粗口，為咗啲無聊嘢問候對方家人，我要俾佢哋感受俾人用粗口問候嘅感受，佢哋已經唔係第一次喺我個ig搞事，不過刪咗個post，出咗啖氣就算！但係如果我啲仔女係咁就……唉！」
揭早有前科
事緣昨日凌晨2時許，軒仔在ig忽然留言：「三更半夜，㷫過辣雞，就嚟瞓着都激到彈起！」然後他點名兩名經常在其ig留言的女粉絲，發出嚴正警告：「你哋再喺我呢度嘈交、講粗口、亂╳咁鬧人，我就即刻Block Q你哋！我忍你哋好╳耐㗎嘞！豈有此理！兩個女仔人家粗口爛舌！冇厘家教！你當我呢度係咩吖，公廁呀？」
軒仔又透露兩名女fans不單有前科粗口爛舌，每次出活動時都會為工作人員帶來麻煩。軒仔更下最後通牒：「你兩隻再係咁，到處留言鬧人唔收聲，我下次就當面鬧你，死梗！」其他fans見偶像動真火，紛紛留言籲軒仔冷靜，之後軒仔將留言刪除。軒仔昨日再貼相到ig已是一些花花草草的照片，更寫上「美好的一天！」
採訪：李森
