大家還記得艾迪嗎？就是82年憑電影《邊緣人》奪得第19屆台灣金馬獎影帝的艾迪，在影壇銷聲匿迹25載，這位金馬影帝當年何以毅然放下電影事業另謀發展？60歲的艾迪現居美國，去年參加完金馬獎後戲癮大發，日前他終於出山，來港拍攝新片《踏血尋梅》。
撰文：黃曉妍
艾迪表示離開香港已經28年，離開影壇有25年，最後一部作品是89年的電影《獵鷹》，亦是這部電影令他無奈退出，他日前接受本報獨家專訪時說：「當年喺台灣基隆拍戲跌斷腳，做完第一次手術，一隻腳好番，另一隻腳依然好痛，每行一步都趷吓趷吓，睇完西醫之後，又睇跌打、針灸，人哋話乜好，我就睇乜，但都係唔得。過咗3年，有個朋友喺台灣嘅長庚醫院做護士，佢介紹我去台灣睇足踝專科，後來做掃描，原來骨同骨之間生咗啲膜，令我每行一步路就好似磨自己一下，嗰3年，我真係好痛苦，而且我親身體驗到人情冷暖，突然間冇晒朋友，受傷後冇人理，個心幾唔舒服，於是我開始淡出。」
直至98年，艾迪離開台灣到英國展開新生活，他說：「退出娛樂圈之後，我喺台灣一間公司應徵做業務，佢話台灣冇空缺，不過英國間工廠有空位，所以我一係去英國，一係就唔請我，於是我去咗英國。做咗1年之後，有次我要同美國分公司聯絡，就咁樣口花花識咗個女仔，就係我現任太太。」
育有一對子女
艾迪透露與太太育有一對子女，分別是14歲的兒子與12歲的女兒，一家於美國已生活了16年，並在美國開設批發公司10多年，主要是在中國出口，然後入口美國，繼而再內銷美國、加拿大、墨西哥等地，他說：「如果我哋要放假，一係太太放，一係我放，如果全家人一齊去旅行，就會選擇喺聖誕節至1月1日期間，因為呢段時間嘅生意最淡，好似幾年前暑假，我太太帶兩個小朋友去中國旅行，我就要留喺美國睇檔。」在美國生活，艾迪笑言十分無聊，但提到與太太的生活點滴，他笑說：「我哋相處幾好，冇乜爭執，就算有都係因為岳母，哈哈哈，呢個訪問，喺美國睇唔睇到？算啦，睇唔睇到唔重要，因為我岳母唔識上網，但佢啲friend會唔會話畀佢知，我就唔知喇！」
「痛恨」張家輝
艾迪離開影壇後，曾不想接觸娛樂圈，後來再慢慢開始留意，他謂不得不提「七料影帝張家輝」，他說：「呢個人真係一定要講，佢好得意，做小人物做得好神似，神似得嚟真係好想踢佢一腳，做得好到位，好乞人憎，哈哈！我有睇佢套《激戰》，佢已經46歲，操到咁樣喎，嘩，佢真係可以上台打MMA，《激戰》之後，佢又走去《掃毒》喎，我真係對呢個演員佩服到五體投地，去年金馬獎見到佢，我走埋去同佢握手，仲要篤吓佢個心口，問佢嗰六嚿嘢呢？佢話變咗一嚿。」
【話你知】邊緣人賺觀眾熱淚
退出影壇有25年的艾迪，82年憑章國明導演的電影《邊緣人》成為台灣金馬獎影帝。片中飾演臥底警察的艾迪，在尾段時被村民誤以為是䕃匪而遭活活打死，以同袍金興賢悲痛莫名狂吼結尾，該幕當年令不少觀眾特別是女性淚灑戲院。自此但凡從事臥底工作的警察都被稱為邊緣人，經典程度就如早年的《無間道》一樣。
嫌肉酸減20磅
現年60歲的艾迪，身形fit夾型，他笑謂如果要做幕前，不能接受自己走樣及殘樣，所以在去年11月出席台灣金馬獎前減掉20磅，他說：「當日台灣金馬獎搵我，但我冇去攝影棚同大家一齊影相，於是叫我影一套相畀佢哋，我就搵咗美國做雜誌嘅朋友幫我影，影完之後，我覺得自己好肉酸好肥，當時我172磅，所以喺4月至11月期間減咗20磅，好容易減啫！」是否做運動減肥？他說：「唔係，首先我改變飲食習慣，改食糙米、麥包，每日食完早午晚三餐之後15分鐘內，無論如何都唔坐低，唔好養大個胃同肚腩。」
