一，79日環遊世界，79日佔領運動開出的雨傘奇景，傳遍世界。一遮傍身，全球通行。
二，79日的雨傘傳奇，並無陀衰家，香港經濟沒塌下來，相反，旅客有增無減，新樓盤賣個光光。雷教授說佔領兩日，已經讓香港唔見3500億，估計，是指87枚催淚彈，總值3500億！
三，曾偉雄說要花三個月，將扮演主導角色者緝捕歸案。光明磊落地推斷，曾偉雄即將緝拿英國催淚彈供應商歸案！告佢吊高來賣！
四，愛字頭和葉劉送出極多果籃慰勞警察。警署順勢做埋果欄；警棍最新用途，是用來代替刀仔，無悔這生，用警棍乜乜乜食榴槤。
五，佔領令紅van塞車荷包有損失，唔係嘛，睇滬港通這部車，直通得幾爽！滬港通冇蝕，潮聯算老幾？
六，今年聖誕，唔使帶小朋友睇卡通片，因為「黑警與狼」這齣暴戾三級片，提早上畫，足本放映79日，細路對白唸到熟：「救人？救人都照打！」
七，人之常情，經過再啟蒙，香港人冇得u-turn了，參加自由鳩嗚團時，記得帶把遮。