【亞視風雲之艱難時刻】大後日是冬至，家家必加餸團圓，可是亞視員工被公司拖欠11月份薪酬，出糧無期，新聞部同事發起若大後日沒糧出便邀勞工處派員來登記協助追討欠薪，亞視一哥劉錫賢直言有同事「連返工錢都冇」，他與蔡國威、黃集鋒和張家瑩都支持登記行動，不排除把追討行動升級。
亞視今年兩度拖欠藝員薪金，至今旗下700名員工的11月薪酬仍沒過數，新聞部同事前日發出最後通牒，大後日冬至會邀請勞工處為員工進行追討欠薪登記。根據法例，超過一個月欠薪期限，員工會自動解僱，新聞部員工計劃被遣散當日停止運作，有可能元旦全面停工。藝人的包薪合約雖有別於一般職員，但亞視一哥劉錫賢、六合彩之子蔡國威、亞洲先生黃集鋒和亞姐張家瑩，昨均表示當日仍未出糧，將齊齊返台登記。
希望財困同事互助
幕前藝人可憑知名度出騷賺外快補貼，但新聞部同事和幕後員工的合約是月薪計，無糧出仍要「貼錢」返工，壓力甚大，劉錫賢非常體諒：「其他職員或新聞部同事月薪支糧，冇咗人工仲要撐住，有啲同事同我呻話連返工錢都冇，尤其有家庭負擔同事真係好慘。」大後日會返亞視登記追薪嗎？劉錫賢說：「如果其他同事有財困問題，我希望大家可以互相幫忙，暫時未知會唔會行動升級。」劉錫賢前晚請黃集鋒和蔡國威食飯，然後三人結伴睇首映。
蔡國威連日都關注欠薪的切身問題，他昨日在電話說：「下星期一我要返公司開工，會順便登記，始終呢個程序係保障員工，又唔使錢，又可追番啲錢。」他支持藝員團結一致：「幕後同事冇糧出，貼錢返工好困難。」數月前續約的張家瑩也支持登記追薪，她昨在電話中說：「我跟大隊登記，不過我對公司有信心，相信佢哋可解決到。」
筱靖努力𢱑撈搵銀
自爆戶口僅剩7.94元的黃集鋒本月底約滿，近日他為前途兼錢途都感到苦惱，他昨在電話回應：「如果師兄（蔡國威和劉錫賢）星期一返去登記，我都跟佢哋咁做。」明年中才約滿的筱靖近日主動提出解約，她昨說：「我星期一唔返去登記，唔係唔等錢使，只不過唔想將時間放喺呢度，不如去搵銀，將來追討到欠薪咪捐做善事。」
有部份亞視員工願意把追討行動期限拖至下周三平安夜或假期後的月尾29日。人心惶惶同時，再傳出英皇老闆楊受成有意購入，英皇高層霍汶希昨說：「冇回應。」亞視公關部發言人則說：「公司𠵱家有唔同潛在新股東洽談中，唔評論任何嘢。公司未收到同事採取工業行動通知。」高志森昨在微博用鐵達尼號沉船比喻亞視現況：「海水已浸至甲板面，根下，我敬畏，亦憤慨，三個老闆，若有三個口，加起來可望有『品』，三個都消失了，就是棄船，見死不救，就是『冇品』。」
採訪：劉敏、楊潔雯
