中原地產創辦人施永青一向對旗下員工「絕不手軟」，但講緊嘅係加人工同派花紅。噚日旗下嘅中原同利嘉閣，就講明全線後勤下年1月1號起，一律加人工5%，跑贏通脹，對呢兩間代理行後勤夥計嚟講，應該算係一份唔錯嘅聖誕禮物。
近期樓市有一手新盤撐起，代理行生意明顯好番少少，中原今年頭11個月，住宅部及工商舖有31.3億元佣金，同去年比升咗近四成，估計全年佣金收入可達34億元。利嘉閣就喺今年做咗13億營業額，同去年比都升咗三成。所以呢，兩間行下年加人工幅度都比今年好。中原今年主任級只加4%，後勤員工就一樣加5%。利嘉閣今年就只平均加4%。
至於另一代理美聯（1200）就話，就算有得加都要等下年4月，皆因佢哋嘅財政年度係喺4月起計，據其中一名執董講，今年公司發過盈喜，估計「有表現」嘅員工加人工幅度會多過今年嘅4至6%喎。