香港人大叫「我要真普選」之聲，冇因清場而消失，又多謝CCTVB示範咩叫假普選。早幾日所謂視帝、視后選舉，參選條件冇友台份，仲惡過人大決議；話就話全民投票，但只佔5成分數，其餘5成就由自己人嘅所謂專業評審決定。乜咁似香港立法會，有直選同功能組別兩個陣營，其中一個陣營永遠同民意背道而馳嘅？
咁講真，所謂國際足協金球獎，咪又係小圈子選舉，同歐洲足球先生合併後，有資格選球王就係全球國際足協成員國教練及隊長，以及數百個具輩份傳媒。小弟唔係質疑功能組別專業性，坦白講坦桑尼亞、馬爾代夫嘅國家隊隊長，一年睇咗幾多場波？至於嗰班足球傳媒，都同歐洲主流球會有千絲萬縷嘅關係。再者，都要多謝國際足協嘅「篩選」，德國奪世盃，理應最具資格有球員挑戰C朗（右）、美斯壟斷，不過最後3強入圍嘅德國兵係門將紐亞，要呢班「功能組別」選門將，真係有難度。
小弟大膽講C朗可以坐定粒六蟬聯金球獎，周六拎唔拎到世冠盃都只係錦上添花。其實佢領皇馬勇奪歐聯，呢排球隊遇神殺神，連贏21場，又好難唔畀佢。不過好似電影《黑社會》鄧伯所講，唔可以畀一個人獨大，我都希望球壇可以平衡吓。
文：牽牛