一年將盡，好快就到2015，每年聖誕日之前，年年十二月二十二日就係冬節（即冬至，俗稱做冬），老人家話冬大過年，冬至晚上必定要全家一齊食飯，以前就話在屋企煮飯啫現在一來絕大部份人冇時間煮飯，年輕主婦唔識煮飯，二來屋企地方細（以香港人平均居住面積計），一家三代齊齊在家吃飯嘅話，每感擠逼，於是時興到飯店訂枱，一個冬節，全港飯店食肆、酒店中菜廳無不爆棚。今年十二月二十二日係星期一，大多數人為咗方便，大多改在星期六（二十日）﹑星期日（二十一）晚上做冬，因星期六係賽馬日，更多人選在星期日做冬啦，左丁山家族亦不例外。點知訂好晒位之後，突然有一位家人夠八卦，叫左丁山查吓「通勝」做冬吉時，左丁山打開本蔡伯勵永經堂通勝一睇，唔睇就去食飯，可當係不知不忌，一睇就急急通知各人要改期，但星期六晚已經搵唔到枱咯，幾乎係全港滿座（吉日吖嘛），唯有順延到星期一做冬正日，次日星期二要早返工都係咁話嘅啫。
通勝載：「十二月二十一日星期日，宜拆卸，日值四離，餘事不註。」唔知就話啫，睇到通勝咁寫，在四離日一家做冬，總係無法感覺良好，話我迷信都係咁話。各位讀者大可當左丁山係儍嘅。
上星期日沙田有國際大賽，左丁山一入場就俾人追問貼士，邊度想害人吖，一於話冇，一位老友大喝一聲：「你在專欄寫咗啲擦鞋仔貼士出嚟，快啲講仲有冇有分頭嘅心水，唔好收埋食。」邊度有咁多冷門心水吖，是日熱門當道，係到尾場先至叫做爆冷。不少人如餐廳R及左丁山，好似場場收錢，加埋原來入不敷支，埋單蝕錢，得個玩字。但賽後收到一位朋友短訊，話照左丁山專欄貼士買第八場三隻馬，即威爾頓、軍事出擊，模範駒，買三重彩複式，六十元投注收番1053元，非常高興，話左丁山眼光獨到喎，自己為之苦笑。有早知冇乞兒，早知喺第八場重槌出擊，只賭一場，咁咪幾發囉，可惜自己唔係真賭仔呢。今年國際大賽入場人數（七萬八千人），投注總額（14.6億），外國匯合彩池都破晒紀錄，可見大賽之吸引力，確係亞洲賽馬盛事。今年在馬場周圍見到一位靚仔相片，唔知係邊位，捉住肥仔K問吓，佢話叫做彭于晏，係浪琴表代言人，台灣紅星，但加多一句：「我地年輕人識得佢，可惜啲fans未必有資格買浪琴表，你地班人有資格買，但唔知佢係邊個！」