呢個禮拜有兩套幾啱龍叔叔口味嘅BD碟推出，一套《忍者龜》，鬼佬打功夫有特技有笑料有回憶，只係真人版造型有啲重口味。另一套《颶風中心》，大自然災難片永遠有market，而且近日北風呼呼，有乜比喺屋企扭大音響狂炸《颶風中心》更啱feel？打開埋窗引風入屋，簡直係自製4D影院𠻹啦。
久唔久總有一套大型災難片上畫，毋須名牌演員、高深劇情，所有錢使落特技度就一定冇衰，你睇強如《明日之後》、《2012》，劇情真係不敢恭維，票房大收全靠死人冧樓。龍叔叔覺得唯一例外，係18年前史提芬史匹堡參與製作嘅《龍捲風暴》，劇情鋪排同生離死別拍得相當有功架，當年特技冇今日咁無敵，但都拍到令觀眾O晒嘴嘅龍捲風威力，龍叔叔翻睇咗超過五次。
自拍都係人之常情
珠玉在前，同樣齋玩龍捲風嘅《颶風中心》，其實都好難擺脫呢類戲嘅公式：唔識死嘅追風族、為名為利嘅科研人員、老竇救仔冰釋前嫌等，劇情有幾老套真係冇所謂，反正第一男主角係EF-5級颶風。不過《颶風中心》開首用成半粒鐘去鋪排人物間嘅關係，搵滴風睇吓都冇，仲納悶過李氏力場下無奈換衫返工嘅情景。好彩，風暴一現，氣勢即時返晒嚟，大大細細不同龍捲風排住隊上場，錐狀、繩狀、巨柱狀，再加埋EF-0至EF-5唔同級數嘅龍捲風，短短90分鐘戲，仲多過美國幾年嚟加埋出現過嘅龍捲風數量，而且破壞力驚人，十個李氏力場一齊發功都擋唔住。
當然，由《死神5來了》嘅史提夫昆爾執導，玩番密集式視覺刺激伎倆，可算手到拿來，首次登場嘅火龍捲，都拍得幾逼真，香港人難以親身體驗嘅災難，都會感到一股寒意。戲內有一對YouTuber唔識死，為出位死命追風，令龍叔叔諗起早前喺美國，真係有條儍佬揸車追住龍捲風玩自拍，條YouTube片已經超過五百萬點擊（ https://www.youtube.com/watch?v=P7aRR86VfTY），不過網民大多留言話佢黐線，死咗都冇人可憐。唉，學一哥話齋，冇影響工作下，自拍都係人之常情，只係乞人憎啲咁解啫！
可能電影票房一般，美國首個周末上畫僅千多萬美元，今次喺BD上亦冇花錢搞乜噱頭，本身已冇3D冇IMAX，對呢類純視覺刺激嘅戲已經大打折扣，最離奇係戲院有全景聲版本，風暴包圍感相當紮實，叫做補足番畫面上嘅不足，不過港版BD居然只收錄DTS-HD MA 5.1？冇Atmos都算，反正龍叔叔未添置器材，但起碼都畀番7.1我吖，多咗條普通話配音又算點先？真係幾令人失望。讚位都有嘅，bonus收錄算係驚喜一環，好認真咁解構唔同級數嘅龍捲風特色，又有CG特技嘅合成過程，而且全配上中文字幕，呢半粒鐘bonus都叫睇得過癮嘅。
Profile：
簡介：幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
