香港攝影師揚威國際！《國家地理雜誌》年度照片比賽，香港攝影師Brian Yen一幅喺海洋列車影嘅相，擊敗逾9,200幅作品，奪得最佳人物照片同年度大獎兩項殊榮，捧走1萬美金（7.8萬港元）獎金。
幅相名為「黑暗中的光點」，海洋公園一架逼滿人嘅海洋列車，一位女士喺中間低頭玩手機，手機嘅光喺昏暗車廂反照住佢塊面，形成獨特畫面。Brian形容個女仔透過手機暫時離開周圍擠迫嘅環境，好似蝴蝶咁自由去漫遊世界。佢覺得好矛盾，雖然科技一方面帶來解放，但就令人唔需要再同周圍嘅人友好。
有網民覺得幅相好普通，「一日可以影到10次」，仲話個比賽水平走下坡；亦有攝影網站讚佢只係用隨身數碼相機，幅相攞獎體現攝影師洞察力先最重要。Brian係業餘攝影師，08年開始喺《國家地理》網站上載作品，佢鍾意搭電車搵攝影靈感，影過基層長者生活嘅相集。