有報道指，今年傷多過踢嘅曼聯中鋒法卡奧，對哥倫比亞國家隊隊友占士洛迪古斯起咗妒忌之心。事關法卡奧因傷錯過喺世盃發光發亮同埋加盟皇家馬德里嘅機會；相反占士除咗成為世盃金靴獎得主，更披起咗皇馬嘅10號波衫！
法卡奧係唔係咁諗，尚且唔去證明，不過如果呢位射手唔係受傷，會唔會喺世盃大放異彩呢？一切已成定局，都無謂諗番轉頭。不過，傷患影響球員生涯成就，難免令人欷歔！好彩Lulu一早對「傷患」呢個名字起咗抗體，因為試問英超邊支球隊，近幾季嘅受傷球員名單，會長得過槍手？
禾確特、奧斯爾、艾朗藍斯等主力今季都成為十字軍。呀！唔記得仲有戴亞比呢位近4年只係踢咗22場比賽嘅「首席文員」㖭！其實阿仙奴（紅衫）收購咗好多好球員，但冇得用，所以球迷與其要阿仙奴換領隊，不如諗吓換醫療團隊啦！可能咁樣先係球隊今季有冇冠軍落袋，或者保住頭4嘅關鍵！
要搵阿仙奴幽自己一默，證明我對佢哋今星期贏波唔係太有信心。畢竟利物浦喺聯賽失分太多，球員求勝心切，應該踢得更落力。對上一次阿仙奴作客紅軍慘敗1:5，不過後者同上季有史杜列治加蘇亞雷斯嘅利物浦，表現真係差太多，所以阿仙奴應該有能力作客逼和利記，合演一場2:2嘅比賽。
LULU
不懂踢波愛睇波