南韓名將朴智星雖然已經掛咗靴，但因為喺球員時代佢從冇欺場，肯拼肯纏，所以深得效力過嘅球隊球迷歡心，好似荷甲勁旅燕豪芬咁，就專登揀咗日前主場鬥飛燕諾嘅聯賽大戰，向「三肺星」致敬。不過，唔知係樂極生悲定抑或係敵對球迷搞事，喺看台上嘅星爺巨型畫像竟然俾煙花射中而着火，認真掃興。
猶記得喺02日韓世界盃後，帶領南韓嘅名帥軒迪克加盟荷甲球隊燕豪芬（PSV），而佢喺03年仲將愛將、中場朴智星帶埋去PSV。星爺喺效力PSV期間幫球隊兩奪荷甲，又奪得荷蘭盃，所以好受球迷歡迎；而星爺仲喺13/14球季回歸PSV，喺該季結束後宣佈掛靴。
巨型海報中煙花燒焦
喺日前PSV迎飛燕諾嘅聯賽大戰中，PSV就正式同星爺搞咗個告別儀式，所以星爺執到正同靚老婆金敏智、恩師軒迪克一齊入場睇波，而當星爺步入草地時，過萬名球迷起立為佢鼓掌，而主場球迷仲好有心咁整咗張超巨型嘅星爺畫像，畫像上面就寫住“Warrior from the South”（南方戰士）。可惜，唔知係咪因為周圍太多人放煙花嘅關係，幅畫像冇耐就着火燒爛咗囉。
PSV險勝飛燕諾4:3
講番PSV對飛燕諾場波，就同樣咁峯迴路轉，作客嘅飛燕諾喺開波13分鐘就由艾維斯文奴先開紀錄，不過，PSV就有腳風好鬼順嘅前鋒盧克迪莊喺22分鐘追平，點知喺42分鐘，飛燕諾又由艾亞馬迪建功而以2:1領先半場；好彩易邊後盧克迪莊入多兩球，個人連中三元，幫PSV以3:2反超前。
以為PSV可以順利全取3分之際，飛燕諾竟然喺89分鐘由卡森李察士追和，唔通場波要和波收場？咁又唔係噃，因為迪比喺補時3分鐘絕殺飛燕諾，PSV以4:3勝出；亦因為迪比呢一球，星爺唔使俾人話黑腳，而PSV以16戰得40分，繼續喺榜首領導群雄。
識睇，一定係睇足英台【英波Live】：
http://soccer.appledaily.com
http://bit.ly/engballlive