呢一年嘅立法會都可謂多事，唔單止搞到主席曾鈺成前日病倒，連立法會個計時鐘都壞埋。話說工黨何秀蘭發發吓言，驚覺個計時器原來冇從頭計時間，於是何秀蘭要求處理好個鐘先，點知個鐘唔係幾聽使咁，搞到要休會5分鐘嚟處理。
其實好多八卦人同八方講過，政總同立會風水麻麻，肯定多是非兼不利主人，淨係睇煲呔同狼英就知！至於曾主席身體情況，曾主席話自小已經有暈眩呢個毛病，醫生話佢呢個病叫做第十對神經敏感喎！其實周二晚佢玩玩吓新相機，突然病發，成個人冒汗兼想嘔，諗住即刻瞓就冇事，點知前日朝早睇完電郵都係唔掂，好在有代主席梁君彥頂住。