臨近年尾唔少財金界人士都陸陸續續收爐，出吓埠嘆番吓。好似年中由瑞信過檔去滙豐金融服務（亞洲）、有「細價股揀股王」稱號嘅劉紹文（Kenny）就已經飛咗去北歐，除咗睇北極光之外，仲準備喺聖誕老人村過番個白色聖誕節。
聖誕留喺芬蘭應節
𠵱家仲身處喺挪威嘅Kenny話，今次佢係一心計劃去睇北極光。不過，北極光𠵱啲嘢真係可遇不可求，年中有唔少人專登去睇都要失望而回。點知Kenny就好好彩，去到首站特羅素（Tromso）頭三日，就有兩晚都睇到。平時好鍾意放相上facebook同班老友分享吓生活點滴嘅Kenny，今次當然都第一時間將佢睇到極光嘅相放上網，等班朋友可以「葡萄」吓。問到佢第一次見到北極光有咩感覺，佢就好得戚咁笑住話，「咦！北極光呀！咁易睇到嘅！」
一向好鍾意玩嘅Kenny已經將今次15日嘅北歐行程塞到密麻麻，除咗睇極光外，仲已經出海睇咗鯨魚。下一站去到芬蘭，佢打算玩埋狗拉雪橇、雪上電單車，聖誕節當日就會去到聖誕老人村應吓節。離開芬蘭之後，佢會喺倫敦留多幾日，仲買咗熱刺對曼聯嘅波飛，睇埋場波先捨得返香港。
雖然Kenny𠵱家可以「梳乎」嘆世界，但佢話計劃呢個行程都幾多嘢煩，做開「廿四孝老公」嘅佢，又唔畀老婆幫手，所以全程籌備都由佢一手包辦。
李華華
mailto:[email protected]