建制派前晚同財爺飯局，個個爭住畀意見，八方聽聞原來最有「創意」嘅建議，係由民建聯「元秋」蔣麗芸提出，佢叫財爺搞個嬰兒基金，向每名港嬰每年注資10,000元，直到18歲為止，但點知黨主席譚耀宗都頂唔順，即場劃清界線話意見不代表民建聯喎。
八方噚日問番元秋，佢仲補充話呢筆錢除非危疾要醫病、買樓或者升學需要，否則唔可以動用，18歲後都冇用過就整筆18萬元款項轉入強積金戶口，繼續滾存。佢仲話自己一日做議員，一日都會盡力爭取，譚耀宗就唔係劃清界線，只係覺得「有排推」，所以叫佢「繼續努力」，譚回應時就話，民建聯「好多同事好有創意」，但蔣嘅建議「唔容易做到」，都係留番畀財爺考慮喎。