又到預報盈喜盈警期，場內星辰（1155）經上年大減值，又有半年靚仔業績打底，有得博翻身，炒盈喜。
星辰主打無線電信覆蓋系統設備工程，今年上半年已經成功虧轉盈2,860萬元（人民幣．下同），有靚仔業績打底。星辰主打瓣數，包括多制式數字信號分佈系統、高性能射頻器件、同多制式加多頻室內信號分佈解決方案，主要係受惠電信基建建設、擴容需求因素。
內地4G開波有運行
上年尾，祖國4G開波，發放TDL-TE牌照之外，再到今年中，批埋TDL-TE/FDD-LTE混合組網。星辰係主打瓣數需求，現時需求轉為活躍，星辰繼續有運行。
星辰喺上年大減值撥備7,600萬元，撇到乾乾淨淨，今年唔會再受撥備影響。數照計，星辰今年冇減值影響，全年盈利已經可以上到8,170萬元，現價0.75港元，預測PE得5.7倍。
除咗上邊電信設備，星辰呢期開多瓣數字對講機業務。按規定，祖國數字化模式，要喺2016年頭全部搞掂，成個祖國市場規模，係講緊高達500億元。
再加埋星辰基地喺褔建，而呢個省又係成個祖國內，數字對講機技術領先同政策支持地區，星辰就有呢個地利優勢。連埋呢瓣發力，唔好計多，星辰今年全年盈利如無意外應該上到9,000萬元，預測PE得5.1倍。
場內細價嘢呢期插水，星辰亦唔例外，家陣喺八年大底，比2007年4蚊高位，跌咗82%。
老老實實，市況唔配合，但星辰基本因素利好，係冇變過，支持集團靚仔業績，呢期調整，仲抵搞。買星辰，博盈喜，當翻半番上到1.1港元咁計，預測PE先得7倍多少少。
錢雋
細價股專家
本欄逢周二、三、五刊出