韓風吹不停，新世界（017）旗下嘅愉景新城將位置最靚嘅複式舖位租畀號稱韓國最大嘅服飾品牌E-LAND，今日開始試業。E-LAND喺內地開成7,000幾間舖，淨係今年已做差唔多25億美金生意。
韓裔嘅E-LAND香港總經理張宰榮豪言5年內喺香港至少開100間舖。佢哋有三條line，SPAO走大眾休閒風，同日本、瑞典嗰兩間差唔多；WHO.A.U玩加州風格，似足老外騷肌賣衫嗰間；英倫學院風嘅Teenie Weenie就行高檔路線，市場上一樣有大阿哥坐鎮。張宰榮笑笑口話：「因為我們不在，所以他們可以發展很快。」咁會唔會參考對面海咁，請韓國型男做售貨員冧客？張宰榮話諗諗佢，港女可以期待吓。