馬會今起展開慶祝130周年活動，一路搞到明年5月，要盡吸大馬迷、小朋友歡心。令人最期待係明年3月底開始「佔添」，所指係由馬會贊助世界著名嘅Cavalia（卡瓦利亞）劇團首次來港演出國際級馬術匯演，有42名演員同50匹馬演出，地點就喺佔中後守衞森嚴嘅添馬公園。
130蚊嘆會所自助餐
Cavalia係由Cirque du Soleil（太陽劇團）早期創辦人之一Normand Latourelle成立，水準當然有保證，有啲評論仲話好睇過澳門「水舞間」。門票幾多錢、有乜優惠，馬會公司業務策劃及項目管理總監梁桂芳噚日賣關子，話留番下月先公佈；至於一旦發生突發佔鐘而影響演出會點做，佢就冇答到。
如果想食好嘢，就要留意下個月10日嘅130周年賽馬日，可以130蚊享受特別自助餐，一次過食勻跑馬地、沙田、雙魚河及北京會所嘅名菜，包括金蒜椒鹽一口牛、飛哥羊腩同葱燒海參等。名額有限，訂位趁早，可致電1817查詢。
若馬迷想食平啲啲，留番啲錢嚟搏殺，咁喺嗰日同2月1日，沙田馬場有十幾款本土滋味小食提供，好似碗仔翅、五香牛雜及豬油渣撈麵等等，每款13蚊，喺馬場食算係平。而明年4月3至5日復活節期間，馬會仲喺沙田馬場同彭福公園舉行「同心同步同樂日」，大小朋友免費入場，有小馬俾小朋友騎。而元旦日開始，130周年紀念品開始發售，焦點係一套11隻、賣近900蚊Q版馬公仔。
李八方
mailto:[email protected]