滬綜指噚日終於都叫做回落少少，成交雖無之前咁高，但兩市加埋仲有成7,000幾億人仔，券商股怒升之勢終於見到有緩和，之前話證監查孖展，亦開始查出結果，有幾間券商被批評，令到個別券商股有回落。
噚日大陸傳媒《21世紀經濟報道》就統計咗，上個月20號至今個月17號，藍籌股股東減持嘅情況，減持嘅金額唔算太多，券商業計埋深圳個市有十幾隻畀股東減持，金額100億元人仔唔夠，不過，大股東高位出貨，好似唔係幾好訊息。
除咗今期紅到發紫嘅券商股之外，其他板塊都有股東減持，包括有電力股、建築材料、鋼鐵、有色金屬，房地產股都有，唔排除有獲利盤，但亦有可能係意識到短期股市風險增加，借勢減持。
近期講開內地個市嘅玩家，除咗公司大股東外，不得不提中國大媽，大媽入市嘅威力，大家已經見識過，甚至有人話大媽去晒玩股，嚴重影響金市同澳門賭業。而家大股東減持仍係少數，亦都唔見得大媽們要為下周一冬至要食好啲而需要沽貨套現，近排逢周五都要憧憬一下降準，短期內大媽逃亡嘅機會唔高。
流氓