大陸寺廟去得多，大家有冇諗過，擺入啲善款箱啲錢，其實去咗邊呢？
如果你去北京潭柘寺嘅話，答案就係，啲錢係俾深圳上市嘅北京文化收咗。
上市公司喺寺廟擺檔收錢，無本生利，簡直係天下最好搵嘅生意。不過股民亦唔使開心住，因為呢筆收入喺年報冇披露，所以好可能係員工自己袋咗。
新華社踢爆，位於北京市嘅千年古寺潭柘寺，裏面竟然擺咗70個善款箱，其中53個係由經營該景區嘅北京文化公司所擺放，只有17個係由寺廟擺放，大家鬥搶生意。北京文化年報有一句提到，「積極開發佛教文化功能的經營項目」，原來就係指呢啲善款箱，善哉善哉。
大陸寺廟全面向錢看，早已非佛門淨地。有媒體曾報道，有啲知名寺廟景區瘋狂斂財，甚至給每一個善款箱都設立創收指標。最出名嘅少林寺，其中51%收益權已經由當地政府賣咗畀香港中旅（308）。
被稱為「少林CEO」嘅方丈釋永信，唔甘心將龐大利益拱手相讓，近年積極自搵財路，又成立影視公司，又搞世界武林大會。遲啲有寺廟直接上市，恐怕並非笑話。
李可強