英超即將步入聖誕快車檔期,最近天氣寒冷,一班球迷朋友或者可以以打邊爐,取代聖誕到會大餐,似乎更加啱feel!特別係今個星期日阿仙奴作客利物浦(圖),相信大家可以「大」豐收,唔知會係入球出現先,定係肥牛熟得快呢?
上星期利物浦大敗喺曼聯腳下,已經向世人說明咗紅軍現時嘅防線,個個都係「人形屏風」。所失嘅第3球,更加係由洛夫雲間接「助攻」,曼聯球員、球迷,應該連一句多謝都未講得切。就算周中英聯盃只係作客英冠嘅般尼茅夫,利物浦贏波晉級都堅持其「好客」風格,後防飽食驚風散。當中突然擔正嘅巴利鍾斯,表現其實還不如米洛列特,兵工廠冇可能面對呢條防線而零入球吧?
阿仙奴經歷兩場大勝後,球隊信心士氣大振,基奧特傷癒加上阿歷斯山齊士狀態不俗,進攻火力根本唔使懷疑!論近績,大世界必定一面倒撐阿仙奴客勝,但始終未到臨場發揮一刻,利物浦始終係一支好難估計嘅球隊,而晏菲路又的確有其主場魔力,相信史達寧、拉爾拉拿亦有望喺主場球迷支持下「盡地一攻」。
阿仙奴火力強,小妹作為紅軍粉絲,但求愛隊把握主場之利取得入球,而且數據上,兩軍近11次喺晏菲路對賽共開出8次入球「大」,呢場大戰一於撐「大」!
KIT
波馬雙線主持