「猜輸嗰個做龍門！」呢句係小弟細個踢波聽得最多嘅一句。冇計啦，邊個叫做龍冇得射波，冇得扭人，失波仲要孭鑊。不過，就算踢職業波，踢到去世盃、歐聯呢啲層次，龍門都係不受重視，想拎金球獎？真係天方夜譚。
近十幾廿年，球壇有好多好門將，係得簡尼同保方入過金球獎或世足三甲，不過只係陪襯，但都已經好過卡斯拿斯！呢位西班牙王朝嘅重要功臣兼隊長，一次三甲都未入過。金球獎都係鍾意中前場球員多啲。做門將，基本上要到世盃年先有啲機，好似簡尼係2002年世足第2同金球獎第3，而保方就係2006年金球獎第2。
今年，門將攞獎嘅希望放喺紐亞（圖）身上，佢比前輩簡尼嘅優勢係贏咗世盃冠軍；比起保方，亦冇其他突出嘅德國隊友分薄票源，加埋佢喺世盃對葡萄牙同阿根廷，兩場都能夠保持清白之身，冇俾美斯同基斯坦奴朗拿度（C朗）入到波。
不過，外界點都係睇好C朗攞獎，真係幾無奈。前排仲睇到單新聞，講曼聯諗住同屢建奇功嘅迪基亞續約，仲開出球壇門將最高薪嘅合約。小弟諗住至少都廿萬鎊周薪嘞啩，點知都係得14萬鎊。吓！唔係啩？艾舒利楊格都13萬鎊啦，迪基亞只值14萬鎊？
文：咖喱