試想像一下，喺呢個凍冰冰嘅聖誕，如果有女神可以陪你一齊過，你話幾咁好呢。又，如果呢個女神係有啲「Baby fat」，咁天寒地凍一齊攬住取暖，你話幾好呢。如果呢個女神係甜姐兒苟芸慧，仲正。
係喎，苟芸慧，好似一個幾陌生嘅名。自從佢前年四月被指介入郭富城同熊黛林戀情，致壓力爆煲，甲狀腺出問題引致肥腫難分，一度停工，努力醫好個病，不過苟姑娘好似中咗不瘦降咁，一度瘦番少少，但之後體重仍然有升冇跌。
咁家陣苟姑娘有咩做緊呢？昨日有雜誌報道佢身形最新變化——三節腩，體重目測有170磅。報道話苟姑娘已遭大台放棄，投閒置散，依家冇劇開，只係得閒接下散 job出席大台宣傳活動或者慈善騷，仲要係唔計騷錢。月入得底薪——萬五蚊。無嘢做，早前仲俾人影到佢去便利店打書釘打發時間。
手停口停，依家苟姑娘自然要慳住使，得閒就去下平民商場濕平。日前仲被影到佢去將軍澳寓所附近嘅平民商場南豐廣場買掃平衫，六十零有交易，最貴都係百二蚊，買滿二百蚊可做member，有九折。幫襯嘅主要都係精打細算嘅師奶同外籍女傭居多。
只見苟姑娘一入到去，就好似好熟架步咁，睇衫之餘同店員吹水，但身穿粉紅色長身衛衣嘅佢動作一大、或者唔記得挺胸收腹，咁嗰三節腩肉就即刻好鬼馬咁彈出嚟。
之後苟姑娘揀咗幾件鬆身上衣，好遮腩，埋單都只不過係三百蚊左右。
其實苟姑娘真係好努力減緊，試過跟伍詠薇學泰拳、做瑜伽，但可能一下之間去得太盡，苟姑娘覺得辛苦，一做完運動又食過。最近佢轉咗plan睇中醫去水腫，大台都話，如果佢減到百四磅，出年就開劇俾佢。
睇番佢個微博，真係少job得緊要，最多只係去下大台台慶，同埋山長水遠去成都出席慈善活動——有貼全身相，但就唔知用咗幾多個腰封先達致有腰效果，但深坑就依然迷倒眾生，真箇又白又滑 ，令人怦然心動。
俾心雞呀苟姑娘!等你返嚟呀!