公司的「仁」概念廣告出事了。
廣告部準備二次創作。
「二次創作會唔會犯法㗎？」
「白痴﹗唔係叫你二次創作，係叫你第二次創作啊！就算真係二次創作，自己惡搞自己，唔通自己告自己咩？」
「老細，佢地話我地醜化隻黑色唐狗，不如就換成一隻白色番狗，咁咪得囉！」
「咁即係一部戲唔搵元秋，而搵美芬做女主角，咪都係拍緊恐怖片！咁即係tree根唔講四字成語，而轉講『悔辱』，咪都係拍緊笑片！」
「老細，導演話，隻黑色唐狗，其實係代表魔鬼化身。唐狗咁忠誠，其實唔係好代表到魔鬼呢個角色。」
「咁你想點啊！係咪想我披住件獸皮落場扮狗啊？」
「唔駛咁麻煩㗎老細，我地就搵一隻狗，包保個個觀眾都認同佢就係魔鬼化身。」
「咩狗？」
「6 8狗！搵隻狗穿住一件印有6 8嘅衫，就會變咗6 8狗。」
「白痴！咁到時啲人就會投訴點解個仔仲要阻住個阿爸替天行道打死隻6 8狗㗎啦！」
「因為我地係法治社會同埋一切都要循序漸進囉。」
「白痴！俾隻6 8狗咬仲唔反抗，呢啲叫婦人之仁！」
「婦人之仁都係仁啊，我地咪當係sell女人補品個條line囉。」
「白痴！我要sell惻隱啊！要sell仁愛啊！」
「老細，我諗到啦！個阿爸本來拎住好大碌木，後來俾個細路阻止，就換咗碌警棍，警棍就係最低武力，這就是惻隱；忍辱負重，這就是仁！」
「白痴！你不如話個細路衝出嚟舉咗面紅旗警告隻6 8狗啊！」
「老細，觀眾雖然無修改廣告權，但就有詮釋權喎。」
「白痴！乜都唔駛改，淨係出呢行字幕就得啦。」
「咩字幕？」
「廣告創作，不可撼動。如有投訴，請再啟蒙！」