騎士開季唔係幾順，仲一度傳出內訌，不過夾咗一排之後，3巨頭慢慢培養到默契，球隊開始打出隊型；點知8連勝斷纜之後就變得好飄忽，周三仲喺主場畀鷹隊大炒98:127，主場6連勝都斷埋。「大帝」勒邦占士，賽後仲一反常態，對住記者發老脾㖭。
騎士球迷提早走人
唔夠1個月前，騎士先炒完鷹隊127:94，今場對手嘅得分王泰亞古仲要有傷冇出；但係人哋總共有7個球員得分達雙位數，其中後備控衞麥克仲攻入個人新高嘅24分。不過咁，主隊嘅大將路夫今場帶病上陣，只係臨場決定頂硬上，入得13分咁少都算情有可原嘅。但係班球員嘅防守就真係抵鬧，去到第4節已經提早上演垃圾時間，占士都冇癮索性出場邊休息。而K艾榮今場9射4中得9分，梗係唔滿意自己嘅表現，賽後就特登留喺球場加操練射波，之後占士仲走埋去同佢密斟打氣，應該係最好嘅支持。
今場比賽尾段主隊落後太多，已經有球迷「開汽水」柴台，之後仲出現上季熱火球迷提早離場嘅經典畫面。難為教練布拉特賽後話對班球員失望嘅同時，仲以為班fans對隊波真係不離不棄：「呢場真係輸得好樣衰，我要向各位一心嚟支持球隊嘅球迷道歉。」
之後有記者問大帝點睇，但佢就冇教練咁負能量，只係話：「我唔覺喎；只有喺總決賽輸波，我先會覺得樣衰。」據講大帝好不滿位記者問埋啲咁負面嘅嘢，答完問題仲幾乎同對方嘈起上嚟，要工作人員拉開㖭。
識睇，一定係睇足英台【英波Live】：
http://soccer.appledaily.com
http://bit.ly/engballlive