聖誕佳節臨近，炒股戰意俾漸濃嘅假期氣氛掩蓋，股評人及基金經理亦暫時放低鑊鏟，準備好精采節目過佳節。獨立股評人「陸叔」陳永陸喺25、26日同一班老友過澳門玩兩日，打算飲飲食食同做spa鬆一鬆。訊匯行政總裁沈振盈同太座亦例牌過澳門叉叉電，平安夜出發、27日返嚟，仲話入賭場耍樂試吓運氣係指定動作。
豐盛金融董事黃國英就選擇提早去澳洲度假，喺上星期五（12日）出發，下星期一先返香港搏殺，噚日華華同佢越洋通電，佢都不忘問「知唔知比亞迪（1211）發生乜事？」
唔出埠嘅，亦準備好節目慰勞自己同屋企人，友達資產管理董事熊麗萍聖誕正日喺尖沙嘴食日本鐵板燒。至於有女萬事足嘅中國銀盛首席策略師郭家耀，成個假期安排都係圍繞佢嘅千金，佢話：「希望阿女見多啲小朋友，唔好咁怕醜！」