《蘋果》上月報道過荷里活道1號嘅古董老店「朱氏」，因業主華懋集團拒絕續租而被迫搬走，老闆娘朱雪梅Sally就算寫信畀集團主席龔仁心陳情，都係冇回音；不過，報道出街後，Sally終於約到華懋嘅租務主任當面傾，華懋仲改變主意，決定繼續同朱氏續租！
Sally嘅古董舖本身做好多佛教古董同藝術品，佢月初去同華懋租務主任傾嗰時，咁啱華懋就喺荃灣如心海景酒店搞緊一場《喜馬拉雅唐卡藝術展》，展出91幅來自不丹同尼泊爾嘅唐卡，龔仁心都有親自到場支持。華懋就同Sally講，其實佢哋都好支持慈善同佛教藝術，知道佢情況後就決定續約；《唐卡展》仲將部份展品移師到Sally舖頭做展覽。Sally噚日啱啱收到正式合約，租期3年，「象徵式」加租約兩成；唔使年尾搵舖搬，Sally話終於放低心頭大石，安心過聖誕。