【財經專題】
佔領運動完結後即踏入聖誕消費旺季，原本是零售商趁機「追生意」的大好時機。惟商戶指今年冬天異常和暖，影響寒衣、火鍋食材等銷情，加上市民心情唔靚，市面聖誕氣氛薄弱。他們對今年最後一個淘金檔期都未敢寄予厚望：「如果埋單有2、3%增長的話，要還神！」這有機會是自2008年以來最淡靜的聖誕。
記者：吳綺慧 周燕芬 林幗欣
今年聖誕，大商場取消倒數活動，商廈外牆的燈飾亦草草了事。「乜你唔覺得今年啲聖誕佈置，全部都唔得咩？直情係唔靚！」一田百貨行政總裁莊偉忠如此形容。
一田：市民消費意欲低
莊偉忠透露，旗下一田在12月首個星期，整體生意按年增長約5%。「天氣入到12月都唔凍，對我哋棉被、冷衫的生意，是有少少影響。」儘管天公不造美，但莊偉忠認為市況較弱的更重要原因，是「今年冇聖誕氣氛」，市民消費意欲偏低：「現時大家對經濟的睇法，都冇年初時咁好景，單係零售業的人工加幅，都比早前想像中少，使錢自然冇咁鬆手。」
莊偉忠自言是業界中較樂觀的一位，他預期隨着聖誕逼近，一田生意最後可增長10至15%；但如計及整個香港零售市場，他卻料最多只會有2、3%增長，「如果有呢個數都要還神！因為貴價奢侈品的生意，依然係唔好。」
潮服零售商包浩斯（Bauhaus，483）財務總監李建昌亦同意，今年天氣和暖令生意更難做：「我哋都係睇住大市，大家都比去年提早減價，所以我哋都早一、兩個星期，為個別品牌做三、四日折扣推廣，不過就未至於需要全線大減價。」
他認為，儘管佔領運動已經結束，但市民消費意欲普遍仍未恢復，料今年聖誕生意按年會有增長，「但要升好多就唔可能。」
雖然日常消費品的生意已略有改善，但貴價奢侈品的寒冬似乎卻仍未過去。
米蘭站看淡奢侈品市道
米蘭站（1150）行政總裁蔡偉國表示，佔領運動後銷售至今仍未見復蘇，「雖然整體旅客數字係仲升緊，但買貴價貨那一批客，係冇返到嚟。」他相信奢侈品市場仍要經歷調整，睇淡今年聖誕生意。
謝瑞麟（417）副行政總裁陳立業表示，雖然佔中事件暫告一段落，但事態仍不斷發展，對消費氣氛、店舖人流仍有一定程度影響。他認為零售市道仍然未回復佔領前的水平，故難以評估聖誕檔期表現，惟公司近日已推出新電視廣告催谷生意，料可帶動人流及消費。
【市民意見】
冇意欲買衫
黃小姐：「今年唔預算買太多嘢，上年有買電話，不過今年費事再換，現時感覺冬天越嚟越短，冇太大意欲買新衫，就算買都係轉季嗰陣買咗，唔會為咗聖誕再去買。」
寧玩摩天輪
何先生：「今年預算會使1,000蚊，主要買嘢食或者去玩，打算去中環個嘉年華玩摩天輪，消費心情冇受影響。」
