講求技巧與創意的街頭極限健身近年興起，遊樂場的單槓和樓梯架是他們的舞台。運動員靠雙手支撐、雙腳離地，身體橫向靜止化身「人體國旗」；時而單手握槓，懸浮半空。每個驚險動作，都是他們苦練成果。原本只愛打機的90後黎啟捷（Ken）機緣巧合接觸街頭健身，三年間脫胎換骨，不但將肚腩練成八嚿腹肌，性格也變得積極，「只要練好動作，之前所有辛苦都抵晒」
為港出戰俄國際賽
Ken自言曾是宅男，與朋友聊天話題離不開遊戲機，「落街都係為咗買點數卡」。有次經過公園，見到有人在單槓上玩極限健身動作，「諗住應該唔難」，偷偷在旁邊試，才知殊不簡單。後來對方主動過來教他，練習半年才做到。他自此愛上極限健身，不時上網自學新動作，也做體能訓練加強全身肌肉力量，每周練習四晚，逐漸尋回自信，「每次上槓，都覺得自己好似能人所不能咁」。
手腕受傷多次，他不放心上，惟獨練習新動作時常感灰心，「同自己講一定要做到，通常好快冇用，但睇片見到好多細路仔做到啲動作，反而激勵自己，冇理由輸畀細路」。今年他憑必殺技「離地掌上壓」贏得香港賽冠軍，更代表香港出戰莫斯科國際賽，雖未奪獎但眼界大開，矢志明年再戰。
拿手做「人體國旗」的黃煒峰（Nicholas）中學時除了體育課，幾乎不做運動，最初做兩下引體上升已覺累，但他善用身形較纖瘦的優點，加上努力鍛煉，現在已是身手靈活的極限健身好手。吳宇軒（Eric）則熱愛這項運動的難度和快感，更因此搣甩酒癮，「重新搵番標竿」，目標成為消防員。三人將於本月25至28日在黃埔新天地表演。
記者：袁樂婷