環球股市震盪，惟有A股一枝獨秀，而成個市，基本係俾19隻券商股帶住嚟行。
可以話券商股大晒。噚日A股十大成交股份，有5隻係券商股，單單佢哋成交，就超過950億元（人民幣．下同），已經超過港股昨日總成交。
排頭位嘅中信證券，昨日成交達390億元，單佢一隻股份嘅成交金額，已經接近港股成交嘅一半！
呢種情況下，可以話券商旺，A股旺；券商衰，A股衰。券商要唱好股市，不如唱好自己。所以大家見到，呢排內地券商出嘅報告，大部份都係「賣花贊花香」，自己唱好自己，再由自己親身演繹所謂嘅牛市。
自11月以來，券商股已經全部翻咗一倍，賺佣、賺孖展息已經唔少。要將股價繼續唱上去，需要扭盡計仔。
最近券商不斷放料，例如中信證券話，自己俾中證監抽查冇事，而近日所傳，券商孖展可能鬆綁消息，只不過將今年8月舊聞再講一次。
呢啲故事，炒到興起嘅內地股民肯收貨，但境外投資者就好難buy。中信證券（6030）H股昨日成交只有18億元，股價係A股升停情況下，仲要跌2%。
李可強