剛啱國際賽日韋達同雷神不斷狂鬥，十場賽事佢兩個夾埋執咗七Win，呢晚渡江跑谷草，兩大高手繼續大鬥法。第二場四班千二米，返嚟係雷神食住韋達，雷神之「天地福星」比韋達座騎「無敵城堡」率先馬頭位衝線勝出，後駒只得第二。但賽後即時亮起研訊及抗議燈號，事關「無敵城堡」最後百多米喺中檔想上前之際，畀前面一左一右，內側之「手到拿來」同外側之「天地福星」封住去路，尤其「天地福星」有點閃入，阻到「無敵城堡」，韋達要抽一抽勒避收慢，「無敵城堡」要繞過「天地福星」，再抄出外檔追，結果姍姍來遲影相飲恨。
韋達有提出抗議，理由係末段受到「天地福星」干擾，經研訊約10分鐘，競賽小組最終裁定抗議無效，「天地福星」維持跑第一，二至四名「無敵城堡」、「手到拿來」及「真如燕」全部不變。「天地福星」今季跑到第四仗卒之贏馬，情況同頭場「比你高」一樣，都係換人即贏，雷神停賽前夕連勝六個賽日，繼續遙遙領前。
「無敵城堡」馬主鄧俊賢表示，對小組的判決極度失望不滿意，他指愛駒全力衝刺時，確實被「天地福星」嚴重干擾，而兩駒的勝負距離只有馬頭位，完全不明白競賽小組的執法準則何在。但「無敵城堡」練馬師徐雨石就認為今次事件是五五波，「手到拿來」閃出，「天地福星」閃入，「無敵城堡」食正三文治，對告不入沒有太多意見。