內地火鍋連鎖店呷哺呷哺餐飲（520）噚日上市，老闆賀光啟當然執到靚一靚主持掛牌儀式啦，之前佢出席投資者推介會嗰陣，已經梳咗個好似「天線得得B」嘅髮型，令人對佢一見難忘。噚日佢依然保持呢個有趣髮型出現，仲好大方咁摸住個頭同華華講：「我知道你們《蘋果》有寫我的髮型啊，哈哈！」咁玩得嘅上市公司老闆，認真少見，真係要畀個讚佢先得。
呷哺呷哺送畀港交所（388）嘅上市紀念品同樣過癮。賀老闆搵人畫咗一幅Q版畫送畀港交所，一班管理層喺畫入面換上卡通造型，最搞笑係，佢哋全部拎住大葱同蝦等火鍋材料演奏，話係奏起「呷哺樂章」喎。