「魔童」王維基大鑼大鼓話要搞嘅港視（1137）網購平台噚日試業，八卦嘅華華當然要身先士卒，試吓佢呢個平台同馬雲嗰個淘寶有乜分別喇。
由於試業期間只得15個品牌可以買，大部份都係護膚品，冇零食，好難買夠400元，獲得免費送貨，華華惟有簡單買支歐舒丹（973）嘅「300ml薰衣草𤩹液」。件貨傍晚7點送到，過程大致順利，送貨嘅哥哥仔提醒，早上9點前落單，當晚7點前就有貨收。
呢件貨140蚊，同喺歐舒丹嘅零售店買一樣，冇着數，仲要畀40蚊運費，即係合共花費180蚊，如果買夠400蚊免運費應該比較化算，起碼唔使自己拎。雖然港視網購有提供回贈，但係要留喺下次購物時用，冇得即時受惠，唔多盞。
不過，相比天貓、淘寶要先格價，然後再揀物流商集運，仲要格埋運費，購物又一定要經支付寶付款，港視網購就較為簡單。用戶註冊後，揀咗心頭好，填好送貨地址就可以用信用卡過數，等收貨。