周二晚英聯盃8強，車路士作客贏英冠嘅打比郡3:1，最搶鏡嘅莫過於法比加斯嘞，因為佢夠晒無私，肯為人民服務！佢呢場一個人打兩份工，除咗又有助攻、今季幫隊友炮製第15個入波外（見附表）；仲撈埋救護員，幫手抬擔架入場，救治受傷嘅中堅葛特蘇馬，難怪領隊摩連奴賽後大讚法比仔態度好！
做球員，相信就最鍾意法比呢類隊友，肯跑肯搏，又唔貪功；平時唔獨食，成日畀啲靚波出嚟造就隊友，呢場就輪到比利時翼鋒夏薩特得米，喺23分鐘接應法比助攻先開紀錄。
葛特蘇馬頭撼頭冇大礙
法比對隊友好，又點止幫佢哋入波，仲會喺危急關頭做埋救護員！完半場前，車路士中堅葛特蘇馬同門將施治撞埋一齊，前者瞓低暈得一陣陣。法比見隊友受傷睇落好嚴重，就同艾斯派古達去幫救護員手，一齊跑住抬擔架入場，希望蘇馬盡快得到治療。雖然蘇馬要被換走，但摩連奴話佢傷勢唔嚴重，唔使入院，仲可以喺下周一對史篤城場英超上陣㖭！法比賽後喺twitter度都講笑話：「我今晚（周二晚）打兩份工呀！」
淘汰打比郡豪言攞4冠
講番場波下半場，左閘菲臘路爾斯56分鐘罰球建功，射入加盟後首個入波；雖然打比郡追番球，但法比喺82分鐘又出手，造波畀雷米攻門，可惜雷米把握唔到，要由舒賀爾尼補中射成3:1，鎖定打入英聯盃4強。摩帥賽後好欣賞為人民服務嘅法比，「佢好有專業精神，你知佢係世盃冠軍得主，但喺呢場英聯盃，佢照樣踢番一樣嘅頂級水準。法比呢種態度，正正係我對所有球員嘅要求。」雖然法比賽後開心到話車仔有能力做4冠王，但摩帥就唱反調，叫大家腳踏實地先。
識睇，一定係睇足英台【英波Live】：
http://soccer.appledaily.com
http://bit.ly/engballlive