文章出街之日，又飛咗去新加坡工幹，跟住要返嚟香港出席唔同嘅活動，繼續搵料。
喺上星期，曾經提過嘅豪特保健（6880），終於同Prof J所講嘅一樣，咪係賣殼囉，係小小溢價，向深圳上市嘅勝邦賣出56%股權，之前都同大家講咗啦，葉氏兄弟嘅一招回馬槍，即係留前鬥後，佢有7.12%股權揸手，同埋醒多123.6萬股嘅認購權證，以1.95元附近為入市位！
另外一隻中國支付通（8325）今日重點寫，但又係停咗牌，近期Prof J唔知好彩定好命，叫買嘅都統統停牌，當然不知道是禍是福！
一早同大家講咗支付通有嘅嘢，兩隻馬未必有，可以喺網上充值同支付，但網下就唔得！
支付通喺全中國預付卡牌發咗六個，其中三個俾其他國企食咗，最近佢哋嘅合作盟友，即中國法定貨幣印發機構中鈔旗下嘅中鈔海思，會發行最少500萬張電子錢包同非接解式支付（即係好似八達通）嘅聯名銀行卡，又話連接10萬個商戶，同粵港澳卡收單網絡（即八達通）拉上關係。
睇古仔就ok，管理層位位有卡士，有Mastermind大中華區經理，主席係民企之父，市值12億元，同大家炒開嘅中國創新支付（8083）嘅40億元，有得博！加上好似班大佬準備出街做路演，睇實佢嘅最新走勢！
福方背景說來話長
另外一隻又係先作預告，又係停牌嘅福方（885），要話福方，真係又可以講一個好長嘅古仔。不過，你一定要記住呢個名——景百孚，佢嘅威水史同明星好有關係，佢嘅旗艦店係嘉年華國際（996），先睇睇佢嗰一年圖嘅走勢先，由兩毫子炒起。
今次喺披露易見到佢突破咗嗰頭出嚟，難得用佢嗰樣，一定有料到，要特別留意，追蹤！
徐燦傑
齊魯國際控股首席策略總監
本欄逢周四刊出