彭博亞洲首富馬雲之前好巴之閉咁講，「說淘寶假貨多的人，肯定沒在上頭買過東西。」呢個言論，難聽啲講，係挑戰緊網民智商。淘寶自鋪路上市後，一直花好多精神洗底。
最近淘寶公佈，聯手上海、福建等地公安，偵破一宗網售老翻Nike波鞋案。公安最後共起獲300幾對波鞋，查封兩條生產線，總值約2,150萬元人仔，拘捕8個涉案人士。阿里仲話今次係公司利用big data進行分析比對，先可以令警方迅速破案。
首先，電商平台打假係應份的，淘寶咁高調讚自己，正正就自打嘴巴。如果淘寶真係正如馬雲所講冇賣假貨，咁淘寶又何必咁努力，標榜自己係打假英雄呢？講開阿里，深圳上市嘅幕牆股方大集團，早兩日公佈中標阿里巴巴大廈等多個項目，涉及資金7.2億元人仔。之後方大突然停牌，內地網民就有無限聯想，估話阿里入股。幕牆股香港都有隻遠東環球（830），係跌到好殘。不過公司業績實際唔錯，半年多賺26%至4,039萬元，毛利率升6.6百分點至14.3%。
雖然至截稿唔知隻方大乜事，反正而家啲當炒股都跌，仲要只係啱啱開始，冇底㗎喎。隻遠東噚日曾跌穿支持，但收市上番去1.28元。咁未來兩日睇吓遠東可唔可以守住呢個水平，另外留意方大幾時復牌同原因，真係有乜嘢好消息，大家到時先落注，當影子股小賭博炒一棍囉。
Fifi
http://www.facebook.com/lovefrystock
本欄逢周二、四刊出