咦！佔領運動唔係清咗場喇咩？點解仲有咁多橫額標語通街掛嘅？仲發光咁靚喎。原來係一群有心人，利用LED光棒，喺戶外投影出連串雨傘革命期間出現嘅標語口號。除咗投射橫額，仲有標語同人物嘅合照。最近喺網上發佈後，人見人like。
創作螢光標語嘅群組叫「形．光」，成員Alex話，佢哋10月開始喺佔領區攝製螢光標語，將大家熟悉嘅口號同圖案投射出來，同佔領區嘅人合照，其中一次仲搵到何韻詩。攝製過程並唔複雜，一支可以輸入圖文嘅LED光棒，加上部相機，用慢快門拍攝就搞掂。
Alex話，佢哋咁做無非都係想為爭取民主嘅香港人打氣，畀啲正能量大家。最新嘅作品完成於銅鑼灣清場後，佢哋去到港島唔同地方，將「It's just the beginning」標語投影喺夜幕之下，鼓勵為真普選抗爭中嘅香港人，唔好因為場已清而氣餒。
計劃聖誕節再出擊
「我哋『形．光』團隊只係普通人，但係我哋明白，生於亂世有種責任！能為別人打氣，就係我哋為香港呢個我哋愛嘅地方出一分力！」Alex認為，雨傘革命仲未完結，只係轉化唔同形式，佢哋已計劃喺聖誕節再度出擊，以光影佔領人心。
李八方
mailto:[email protected]