凡事總有例外，睇練馬師李易達就知，之前佢一直畀人話旗下馬一招了，贏完再出例牌走樣冇冧庄。但呢晚第五場四班一哩，呢位廐主憑「其樂無窮」破數據畀大家睇，此駒贏完再出，唔轉途程同配搭，續配柏寶，雖然由上仗18倍，變為今鋪4.6倍，但跑落照樣添食，成為李廐季內首匹連捷馬，兼且粉碎埋蘇廐「連利之星」轉場開齋之大計，後駒連續第三仗做阿二，服役兩季仲未識贏，第三名則係連續第二場跑位置、今季未交代之「野外桃源」。
近呢兩次周中谷草夜賽好神奇，外檔馬起勢發威，呢晚12檔馬除咗第三場「故事」勝出外，「其樂無窮」同頭場「奄尖大少」分別跑第一同第三。而「其樂無窮」今場建功後，馬主的葉志輝親友中，包括一大班青春索女，齊齊亮相凱旋門拉頭馬，比勝出馬更加搶鏡。