正所謂一沉就百踩，修咸頓喺英超連輸4場，估唔到周二嚟到英聯盃8強，作客甲組仔錫菲聯都輸波收場。領隊朗奴高文仲老羞成怒，同錫菲聯領隊尼祖哥洛夫吵嘢㖭。
修頓開季一度排英超次席，但自從上月尾俾曼城打破主場不敗身，就連輸4場聯賽。佢哋周二作客錫菲聯排陣都好認真㗎，仲有中場舒尼達連傷癒復出，點知63分鐘主隊後衞羅拔夏利斯主射罰球，「聖人」門將費沙科士打撲出不遠，俾米克麥紐迪成功執雞（圖），錫菲聯就靠呢球，1:0淘汰修頓殺入4強。入波本應好開心，但錫菲聯教練基斯摩根繼續向第4球證投訴，結果俾球證驅逐離場；比賽期間朗奴高文同尼祖哥洛夫一直口角，完場後高文仲拒絕同哥洛夫握手㖭，佢賽後話：「我只會同尊重我工作、尊重第4球證嘅人握手。」高文嬲還嬲，球隊5連敗，要諗諗計周六對愛華頓點樣反底嘞。
識睇，一定係睇足英台【英波Live】：
http://soccer.appledaily.com
http://bit.ly/engballlive