【南華內亂之黑工疑雲】南華未「黑」完！南華內亂一波未平一波起，剛接替被炒嘅楊正光，接掌南華帥印嘅馬里奧，自認未獲工作證領軍而爆出黑工疑雲。唔知網絡一班改歌高手，繼早前改完陳奕迅首《浮誇》後，會唔會為紅軍改多首黃貫中嘅《紅黑紅紅黑》，應吓景咁呢？
南華足主張廣勇今個禮拜一宣佈，委任前厄瓜多爾球隊昆卡主帥馬里奧，接替楊正光成為主帥；呢位阿根廷教頭前日首次帶隊，就即刻領軍友賽以2:1擊敗港足，頭威頭勢。但係Super Mario亦都super糊里糊塗，噚日爆出佢原來未搞工作證，換句話說，即係非法黑工！
擁南躉發起反「勇」運動
馬里奧噚日帶隊喺「殺人場」九龍灣公園球場，備戰聽晚對天行元朗嘅聯賽盃，英文只屬「有限公司」嘅佢，未有好好利用到繙譯幫手，有球員反映有時都唔清楚教練想點做。不過，冇工作證單嘢，馬里奧就透過繙譯直認不諱︰「我未有工作證，但我已畀晒相關文件去入境處，不過唔知幾時先至拎到。我只係嚟咗幾日，真係乜都唔知。」
南華副領隊高志超喺收操後現身，對於黑工疑雲，佢仲氣定神閒咁話︰「南華咁大間體育會，當然唔會亂嚟。馬里奧只係同張生（張廣勇）達成口頭協議，其實仲未正式簽約，今（噚）日會幫佢去搞工作證，搞唔切嘅話，禮拜五對元朗場聯賽盃，將會由助教顧錦輝領軍。」
但南華今場之後已連場硬仗（見附表），咁點解馬里奧未上任，又要急住炒光仔呢？而球會未簽約又可以幫佢搞工作證，就更加令人懷疑。難怪有球迷以擁南躉串傑志黑工史畢斯事件，揶揄番少林寺風水輪流轉外，更喺網上話要向入境處舉報南華請黑工㖭。有網民仲喺Facebook推出「對付張廣勇不合作運動第一擊」，呼籲擁南躉喺南華足球隊個官方fb度留言，表達完對張廣勇嘅不滿後再unlike埋佢，霸氣十足。
識睇，一定係睇足英台【英波Live】：
http://soccer.appledaily.com
http://bit.ly/engballlive