數學大師丘成桐指本港中學生讀微積分嘅人數日少，長久會影響本港之科研能力。左丁山讀中學時係文科生，修普通數學，完全未掂過微積分，入到大學讀經濟系就知死，到讀碩士時，更加為咗高級統計、計量經濟而讀到痛不欲生，老早知道自己唔會成為教授，那似得（後來知道）劉遵義在聖保羅男女讀理科，在史丹福主修物理，兩年就畢業，之後轉到柏克萊讀經濟學博士，易如反掌。過往中學未改制成為DSE之時，理科生會修讀附加數學，認識微積分，入到大學讀理學院、工學院，可以銜接得上。點知改為三三四學制之後，連課程、科目都改埋，好多學校怕公開試成績唔好，只准學生修讀六至七科（即必修中英數通識加兩科至三科選修），於是乎，好多理科生不能選延伸數學（類似過往之附加數學），甚至乎在傳統三科理科物化生之中，只修兩科，最近發表嘅學生退修科目之中，中國歷史、中國文學當然上榜，估唔到嘅係，亦有大量學生退修物理，如果中學理科生唔讀物理，唔讀延伸數學，入大學一定唔可以揀物理系，電子工程、電腦工程以及土木、結構等工程學亦非常勉強，正如丘成桐話齋，香港未來之科研能力大受影響，此乃中學學科改制之遺害也，難怪大學內嘅理工科系，名列前茅嘅學生大部份來自大陸，能入研究院攻讀理工科博士嘅，更多來自大陸！對此現象諸多批評嘅議員（主要來自泛民），請唔好批評大學咁多啦，了解吓本地學生在中學讀邊幾科先啦！
香港學生不喜科研，理科尖子爭住讀醫科、藥劑科、環球商業，文科尖子爭住讀法律，繙譯、心理、新聞，近日與一位教授傾起，先知道好多教授或者係遺傳基因好，佢地嘅子女多數入法學院或醫學院，教授話：「做專業人士，前途收入較有保障喎。」做醫生就係啫，做律師就未必，你估個個律師會成為夏佳理或余若海咩，收入冇保證㗎。教授話近年由港大帶動，不少尖子喜歡讀雙學位，如法律與政治、法律與商管、法律與工程等等，佢就不以為然，佢要女兒專心讀法律，考到律師牌先至係真，其他學位待成為律師後先至講，法律與工程喎，萬一兩頭唔到岸，搵嚟搞咩。英美大律師行嘅香港「分店」請見習律師，最緊要係睇法律學科GPA，理得你有冇讀雙學位。律師S一早就教兒子呢個道理，自港大畢業約十年，已在外國大行賺年薪七位數字咯。