大台多位新聞小花都有粉絲，論壇成日貼滿佢哋報新聞嘅靚靚cap圖，不過，近年佢哋一個接一個輪住走，好似被高登仔喻為「至索主播」嘅蔡雪瑩（Snowy），都喺11月同大台講拜拜，唔少粉絲以後見唔到佢報天氣，都好鬼傷心。
Snowy走得快，原來係搵到好路數，佢離開大台冇耐就過咗去四大會計師行之一安永（EY），轉行做公關。噚日佢就以安永公關身份現身公司嘅新聞發佈會，喺現場打點兼講幾句開場白。
佢做慣主播，當然係表現淡定，說話字正腔圓喇。之但係，佢以前做慣天氣女郎、間唔中報道吓《中華掠影》嗰類資訊性嘅古仔，𠵱家忽然轉做會計師行，要接觸大量財經資訊，唔知佢又慣唔慣呢？
多咗時間陪家人
未過試用期嘅Snowy似乎唔想太高調，唔多回應。但聞說佢入咗EY有一個月，有同事帶住都開始適應，滬港通、新股等財經熱話亦慢慢知道係乜東東。
查實Snowy喺大台做咗四年幾，想喺事業上有突破都不足為奇，加上佢出名係孝順女，佢曾經喺微博透露心聲，話唔使輪班，返星期一至五嘅工作有多啲時間陪家人好正，而且仲可以鍾意塗乜嘢顏色嘅唇膏都得咁話。靚女果然係貪靚啲！
除咗Snowy轉去財經界做公關，喺大台由實習做起嘅盤翠瑩上年都轉職馬會；另一位前新聞小花鄭俙璇今年中亦去咗太古地產（1972）做公關，佢話，雖然做記者有趣好多，有時都會掛住，但係考慮到人工同埋穩定性，都係偏向繼續喺公關行業發展，加上佢對地產行業有興趣都好易上手。
李華華
mailto:[email protected]