佔領運動暫告一段落，銅鑼灣之小規模佔領應該好快退場，餐廳R嘅餐飲生意在過去佔領期間（79天），損失慘重，令佢由同情、支持佔中變成反佔中份子，金鐘清場之後佢急不及待問左丁山：「銅鑼灣幾時清場？」呢個問題應該問梁振英啫？佢好整以暇，當睇唔到，就係想大部份市民變成餐廳R咁樣，由支持變成討厭學生之嘛。按道理，銅鑼灣清場，只係警察舉手之勞，曾偉雄收唔到柯打，會係梁振英玩政治啫。（按：已在星期一清場）
餐廳R又問公子L：「你地啲珠寶生意有冇跌呀？」公子L話：「過去兩個月，跌咗三成。」餐廳R追問：「佔中影響得咁厲害？」公子L答：「非也，佔中對我地生意完全冇影響，計生意開單、數量計，仲多咗㖭，自由行人士一樣咁熱烈買珠寶，佢地懶鬼理乜嘢佔唔佔中吖，不過最弊就係豪客少晒，開單多咗但生意銀碼少咗，即係話人人買中價平價貨，高價、豪價珠寶賣唔出，天價貨更唔使諗。」
呢種現象，當然與內地反貪腐有關，與佔中無關，政府報告千祈唔好又賴咗佔中。佔領運動橫跨第四季近三個月，2014年GDP數值宣佈之日，試睇吓政府經濟分析師有乜好講！有一點幾清楚嘅係，如用股市說明佔中產生禍害，已完全站不住腳，本港股市全年有波幅，冇升幅，係完全受美國股市、滬深股市影響嘅。佔領期間，樓價節節上升，一手樓銷售暢旺，完全不受影響，進出口數字更與佔領無關，只受歐美日需求影響。餐飲生意如何？旺角銅鑼灣金鐘食肆有打擊，其他地區食店似乎更暢旺，由此可見分析一場運動對香港經濟之影響，最緊要保持態度客觀，唔好政治掛帥，一有咗愛國政治心態，經濟師分析師就會變成盲眼寫報告，等於瞎說。今年六月間本地碧科會計師樓（畢馬威、羅兵咸永道、德勤、安永）聯合刊登廣告指佔中會對本港經濟釀成傷害，令跨國公司及投資者考慮將地區總部搬離香港，當時左丁山指出碧科違反外國公司不在當地刊登政治廣告慣例，於理不合。眨吓眼過咗半年，碧科可唔可以再刊登一個廣告向香港人解釋有幾多跨國公司／投資者在過去六個月搬離香港，令香港損失幾多份職位呀？會計師最叻數豆豆（bean counter），講政治唔係佢地嗰瓣呢！