立法會噚日中午進行火警演習，雖然立法會外嘅添美道仍有大批佔領人士紮營留守，但完全冇阻立法會走火警，立法會內450人用咗短短11分37秒，即經立法會到達添馬公園集合，連消防局代表都讚表現理想，「咁嘅成績係非常之好、好快嘅」。
雖然火警演習時間理想，但有議員助理事後同八方投訴，指最近立法會秘書處以加強保安為由，阻止議員助理用職員證去不相關樓層後，噚日走火警時，職員發現張證連走火通道嘅門都打唔開，要由議員幫手至走得甩，擔心若果真係有火警，隨時變燒豬。
白鴿黨主席、行管會成員劉慧卿話聽到職員投訴，表明會跟進。秘書長陳維安就話走火警時，議員助理張證應該唔會受阻，稍後會再睇睇。